कार्यक्रम सञ्चालन गर्दै “हाम्रो शहर परियोजना” का कार्यक्रम संयोजक राजनिश कुमार सिंहले परियोजनाको उद्देश्य र तालिमको महत्वबारे प्रकाश पार्नुभएको थियो।

दुई दिनसम्म सञ्चालन भएको तालिममा सहभागी कृषकहरूलाई जलवायु परिवर्तन र यसको कृषिमा परेको प्रभाव, जलवायु सहनशील कृषि अभ्यास, प्रभावकारी पानी व्यवस्थापन प्रविधि (थोपा तथा फोहोरा सिँचाइ, आकाशे पानी संकलन), माटो संरक्षण, एकीकृत कीरा तथा रोग व्यवस्थापन तथा उत्पादनपछिको व्यवस्थापन लगायतका विषयमा विस्तृत प्रशिक्षण दिइएको थियो।

कार्यक्रममा बोल्दै नगर प्रमुख रमेश बुढाथोकीले जलवायु उत्थानशील कृषि प्रवर्द्धनमा यस्ता तालिमहरूको महत्वपूर्ण भूमिका रहेको बताउँदै सहभागी किसानहरूले सिकेका ज्ञानलाई व्यवहारमा लागू गर्नुपर्नेमा जोड दिनुभयो। साथै यस्ता कार्यक्रमलाई नगरपालिकाको तर्फबाट निरन्तर सहयोग र समन्वय रहने प्रतिबद्धता व्यक्त गर्नुभएको समाज रूपान्तरण सहजकर्ता बिद्या पौडेलले जानकारी दिनुभयो।

यस तालिमले कृषकहरूको उत्पादकत्व वृद्धि गर्न, बदलिँदो जलवायुमा अनुकूलन क्षमता सुदृढ बनाउन, खाद्य सुरक्षा सुनिश्चित गर्न तथा ग्रामीण–सहरी बजार सम्पर्क विस्तार गर्दै दिगो स्थानीय आर्थिक विकासमा टेवा पुग्ने अपेक्षा गरिएको आयोजकले जनाएको छ।

दुई दिनसम्म सञ्चालन भएको तालिमको सहजीकरण कृषि तथा वातावरण विज्ञ दय विष्णु प्रसाद गुरागाईं र नविना दाहालले गर्नुभएको समाजकी अर्की सहजकर्ता पुनम भट्टराईले बताउनुभयो।