कार्यक्रममा उपप्रमुख हरिमाया घलानले विद्यार्थीहरूलाई परिश्रमी भई भविष्यमा साहित्यकार, इन्जिनियर, प्रोफेसर वा चिकित्सक बनेर विद्यालयको नाम उज्ज्वल बनाउन आग्रह गर्नुभयो।

त्यस्तै वडा अध्यक्ष केशवराज थापाले विद्यालयमा नैतिक र व्यवहारिक शिक्षासँगै विज्ञान प्रयोगशाला र कम्प्युटर कक्षा सञ्चालनमा आएको जानकारी दिनुभयो। उहाँले माध्यमिक तह (कक्षा १२) सञ्चालनका लागि तयारी भइरहेको बताउनुभयो।
वि.सं. २०२८ सालमा पूर्व–प्राथमिक तहदेखि शुरु भएको माईरानी मिक्चनी माध्यमिक विद्यालयमा हाल कक्षा १० सम्म अध्यापन हुँदै आएको छ। विद्यालयमा ४७० जना विद्यार्थी अध्ययनरत छन् भने मावि तहको पढाइ दरबन्दीविहीन शिक्षकहरूको सहयोगमा सञ्चालन भइरहेको विद्यालयले जनाएको छ।

विद्यालयका विद्यार्थीहरूले एसईई परीक्षामा करिब ५० प्रतिशत नतिजा ल्याउन सफल भएका छन्। उद्घाटन कार्यक्रममा शिक्षक कमल न्यौपानेले सञ्चालन गर्नुभएको थियो भने बासुदेव साहले स्वागत मन्तव्य व्यक्त गर्नुभएको थियो। कार्यक्रममा स–साना बालबालिकाले नृत्य प्रस्तुत गर्दै अतिथिहरूलाई स्वागत गरेका थिए।