कार्यक्रममा बोल्दै उपप्रमुख हरिमाया घलानले ‘समृद्धिका लागि वन परियोजना’ ले स्थानीय तहमा वृक्षारोपणप्रति जनचेतना वृद्धि गर्न, खाली तथा बाँझो जमिनको सदुपयोग गर्न, जनप्रतिनिधिहरूलाई वन तथा वातावरणसम्बन्धी नीति, नियम र कानुनबारे जानकारी गराउन तथा नदी उकास क्षेत्र र सडक किनारमा वृक्षारोपण विस्तार गर्न महत्वपूर्ण भूमिका खेलेको बताउनुभयो। उहाँले आगामी आर्थिक वर्षहरूमा पनि परियोजना सञ्चालनलाई निरन्तरता दिन सम्बन्धित निकायसँग आग्रह गर्नुभयो।

वार्षिक मूल्याङ्कनमा पर्साको जगरनाथपुर गाउँपालिका प्रथम, सिराहाको नवराजपुर नगरपालिका तेस्रो तथा पटेर्वा सुगौली गाउँपालिका चौथो स्थानमा परेका छन्।

कार्यक्रममा वन तथा वातावरण मन्त्रालयका उपसचिव प्रकाश थापा, गणेश कार्की, महेश ढुंगाना, वन विज्ञ पशुपतिनाथ कोइराला, मधेश प्रदेश वन निर्देशक जगरनाथ प्रसाद जयसवाल, डिभिजन वन कार्यालय बाराका प्रमुख सुजित कुमार झा, वन अधिकृत वर्षा लामा, योजना अधिकृत लालबाबु यादव, अनुगमन तथा मूल्याङ्कन विज्ञ सन्तोष दुबे लगायत वन तथा वातावरण क्षेत्रसँग सम्बन्धित विभिन्न सरोकारवालाहरूको सहभागिता रहेको थियो।

उल्लेखनीय कुरा के छ भने हरिवन नगरपालिकाले गत वर्ष पनि मधेश प्रदेशमा दोस्रो स्थान हासिल गरेको थियो। लगातार दोस्रो वर्ष उत्कृष्ट कार्यसम्पादन गर्दै प्रदेशकै अग्रणी स्थानीय तहका रूपमा आफ्नो पहिचान स्थापित गर्न नगरपालिका सफल भएको छ।