सर्लाहीमा छठ पर्वको तयारी व्यापक रूपमा भइरहेको छ । सर्लाही जिल्ला भरि ४७३ पोखरी, खोलानाला र अन्य जलाशय किनारमा छठ घाट निर्माण भइरहेको सर्लाही प्रहरीले जनायको छ । स्थानीय बासिन्दाहरूका अनुसार सर्लाही जिल्लाका २० वटै पालिकामा जलाशयका किनार सफाइ गरी बाँसका खट गाडी बत्ती जडानका साथ छठ घाट बनाउने काम भइरहेको स्थानिय कमल महतो बताउछन ।

अहिंसाप्रति मानवको रुचि बढाउने र सबै जीवहरूप्रति सहानुभूति राख्न अभिप्रेरित गर्ने तराई–मधेसवासीको महत्वपूर्ण पर्व छठको रौनकता छाएको छ । तराई–मधेसका मुख्य पर्वहरूमध्ये मिथिला थारू तथा भोजपुरी महिलाहरूको विशेष कठोरताको पर्वका रूपमा रहेको छ । यो पर्वलाई यहाँ सबैभन्दा ठूलो एवं प्रकृति र संस्कृतिसँग जोडेर हेर्ने गरेको बबंरगज स्थानिय शिबनन्दन राउतले बताए ।

चार दिनसम्म मनाइने छठ पर्वको पहिलो दिन व्रतालुहरू नुहाएर अरबा अरबाईन भोजन गर्ने गर्दछन् भने दोस्रो दिन साँझ प्रसादको रूपमा चामल, सक्खर र दूध मिलाएर बनाएको खिर ग्रहण गरी खरना गर्दछन् । त्यस्तै तेस्रो दिन अस्ताउँदो सूर्यलाई अर्घ्य दिन तयार पारेको पूजा सामग्री घाटमा लगेर पूजा गर्ने गरिन्छ । रातभर सूर्यको आराधनामा मग्न भएका भक्तहरूले भोलिपल्ट उदाउँदो सूर्यको पूजाआजा गर्दछन् । बिहानीमा सूर्यको न्यानो किरणसँगै व्रतालुहरूले अञ्जुलीमा पानी भरि जल चढाउँछन् र पालैपालो ठकुवा, भुसुवा, फलफुल र मिठाई जस्ता प्रसादहरू अर्पण गर्दछन् । त्यसपछि घरमा गई सूर्यको प्रसाद ग्रहण गरी ब्रत खोल्दछन्े परम्परा छ ।