जिल्ला बार एशोसियसन सर्लाहीका अध्यक्ष अधिवक्ता ओमप्रकाश थापाले हिंसा गर्ने तथा गराउने व्यक्तिलाई लागू हुने कानुनी कारबाही, सजाय–जरिवाना र सरकारी वकिल कार्यालयबाट असहाय तथा विपन्न वर्गका पीडितलाई उपलब्ध निःशुल्क सेवा बारे जानकारी गराए। उनले आवश्यक परे कानुनी उपचारका लागि सहयोग रहने प्रतिबद्धता प्रस्तुत गरे।

कार्यक्रमका प्रमुख अतिथी पार्वती विश्वकर्माले लैंगिक हिंसाको ऐतिहासिक पृष्ठभूमिबारे प्रकाश पार्दै सामुदायिक वनले महिलालाई ५०/५० को कार्यकारी पदमा अनिवार्य सहभागिता दिलाएर नेतृत्व विकास, आर्थिक सशक्तीकरण तथा जीवनयापन सुधारमा महत्वपूर्ण भूमिका खेलिरहेको बताइन्। यसले आर्थिक हिंसा न्यूनीकरणमा उल्लेख्य योगदान पुर्याएको उनको भनाइ थियो।

कार्यक्रममा सामुदायिक वन विकास तथा महिला हिंसा न्यूनीकरण क्षेत्रमा सक्रिय अन्तरपार्टी महिला संघ हरिवन की अध्यक्ष पदमा मोक्तान, सचिव संचिता घिमिरे, स्वास्थ्यकर्मी लक्ष्मी आचार्य लगायत ८ जनालाई दोसल्ला ओढाइ सम्मान गरिएको थियो। त्यस्तै कानुनी क्षेत्रका अधिवक्ता ओमप्रकाश थापा, प्रहरी निरीक्षक चन्द्रकान्त अधिकारीलाई क्रमशः ढाकाटोपी र कपुरको बोट प्रदान गरी सम्मान गरिएको आयोजक महासंघका उपाध्यक्ष प्रल्हाद बुढाथोकीले जानकारी दिए।

कार्यक्रममा नेपाली कांग्रेसका नेता डाकुरनाथ खतिवडा, महिला नेतृ तारा सुवेदी पोख्रेल, पबि माया पाख्रीन, आशिका खड्का सहित विभिन्न सामुदायिक वन उपभोक्ता समूहका पदाधिकारी, संघ–संस्थाका प्रतिनिधि तथा सञ्चारकर्मीको सहभागिता रहेको थियो। कार्यक्रम सामुदायिक वन उपभोक्ता महासंघ सर्लाहीका सल्लाहकार संयोजक माधव थापाले सञ्चालन गरेका थिए।