उक्त कार्यक्रममा राजधानी दैनिकका डिल्ली आचार्य र रातोपाटीका नरेश ज्ञवाली लाई ‘हीरा–सिद्धि क्रियाशील पत्रकारिता पुरस्कार’, नयाँसडक दैनिकका ज्ञानप्रसाद पौडेल लाई ‘धर्मरत्न शाक्य जीवन्त पत्रकारिता पुरस्कार’ तथा दियोपोष्टकी रीता बुढाथोकी लाई ‘सम्राट आचार्य स्मृति पत्रकारिता पुरस्कार’ प्रदान गरिएको महासंघले जनाएको छ।

त्यसैगरी, नेपाल टेलिभिजनका ईश्वर महर्जन र मिडिया सञ्चार डटकमका केदारनाथ दाहाल लाई ‘ललितपुर पत्रकारिता पुरस्कार’बाट सम्मान गरिएको छ। उनीहरूलाई पत्रकारिता क्षेत्रमार्फत सार्वजनिक महत्वका विषय तथा ललितपुरसँग सम्बन्धित विषयवस्तु उजागर गर्न पुर्‍याएको योगदानको कदरस्वरूप सम्मान गरिएको महासंघले जनाएको छ।

कार्यक्रममा पूर्व प्रधानन्यायाधीश राउतले पत्रकारिताले सुशासन प्रवर्द्धनसँगै नागरिकमा सहिष्णुताको संस्कार विकास गर्न खबरदारीको भूमिका निर्वाह गर्नुपर्नेमा जोड दिएका थिए।

नेपाल पत्रकार महासंघ ललितपुर शाखाका अध्यक्ष रामहरि कार्की को सभापतित्वमा सम्पन्न कार्यक्रममा महासंघकी उपाध्यक्ष नितु पण्डित, बागमती प्रदेशका प्रेस रजिष्ट्रार रेवती सापकोटा, पुरस्कारदाता मुक्तिनाथ आचार्य तथा महासंघ ललितपुरका उपाध्यक्ष श्याम तण्डुकार लगायतले मन्तव्य व्यक्त गरेका थिए।

साधारणसभाको बन्दसत्रमा शाखाका सचिव दीपक अर्याल ले प्रस्तुत गरेको सांगठनिक प्रतिवेदन र कोषाध्यक्ष कृष्ण पौडेल ले प्रस्तुत गरेको आर्थिक प्रतिवेदन सर्वसम्मत रूपमा पारित भएको अध्यक्ष कार्कीले जानकारी दिए।

सम्मानित भएपछि पत्रकार पोख्रेलले उक्त पुरस्कारले आफूलाई थप ऊर्जा र जिम्मेवारीबोध गराएको प्रतिक्रिया दिएका छन्। सत्यतथ्य समाचारमार्फत नागरिकका आवाजलाई अझ प्रभावकारी रूपमा उठाउँदै समाज परिवर्तनमा योगदान पुर्‍याउने प्रतिबद्धता व्यक्त गर्दै उनले आफूलाई पुरस्कारका लागि योग्य ठानी सम्मान गरेकोमा नेपाल पत्रकार महासंघप्रति धन्यवाद तथा हार्दिक आभार प्रकट गरेका छन्।